ул. Бриселска бр.9/1-8, Скопје

ОД 01 ЈАНУАРИ 2022 ГОДИНА, НЕДЕЛА- ДЕН НА НЕДЕЛЕН ОДМОР

Во „Службен весник на Република Северна Македонија“ бр.288/21 објавен е Законот за изменување и дополнување на Законот за работните односи („Службен весник на Република Северна Македонија“ бр.52/05…151/21), кој стапува на сила осмиот ден од денот на објавувањето, а ќе започне да се применува од 1 јануари 2022 година

Според измените:

  • ден на неделен одмор е недела;
  • на работниците кои ќе работат во недела им следува додаток н аплата за работа во недела кој изнесува најмалку 50% за секој час поминат на работа, доколку со закон и колективен договор не е утврден повисок износ на додатокот и
  • право да користат неделен ден во наредните седум дена.

Исклучок од неработењето во недела:

За работниците кај работодавачите во дејностите кај кои работниот процес е од таква природа што не може да се прекине поради техничко – технолошкиот процес и потребата од континуитет во работата, ден на неделен одмор може да биде друг ден во неделата и тоа во дејностите:

  • Одгледување на животни;
  • Мешовито фармерство;
  • Вадење на јаглен и лигнит;
  • Вадење на руди на метал;
  • Печатење и издавање на весници;
  • Производство на леб, сатки во свежа состојба и бисквити;
  • Производство на пиво, само во процесите поврзани со варење, квасна припрема и следење, ферментација, филтрација и енергетска поддршка на овие процеси;
  • Производство на основни фармацевтски производи и фармацевтски препарати;
  • Производство на плочи, листови, цевки и профили од пластични маси;
  • Производство на индустриски гас;
  • Производство на метали;
  • Аптеки;
  • Снабдување со електрична енергија, гас, пареа и климатизација;
  • Снабдување со вода, отстранување на отпадни води, управување со отпад и дејности на санација на околината;
  • Копнен, цевоводен, воден и воздухопловен транспорт;
  • Складирање и помошни дејности во превозот;
  • Објекти за сместување;
  • Дејности за подготовка на оброци и служење на храна;
  • Филмска дејност, дејности за видео и телевизиска програма;
  • Емитување на програма;
  • Телекомуникации;
  • Информативни услужни дејности (хостирање, обработка на податоци, интернет портали и сл.);
  • Прикажување на филмови;
  • Фотографски дејности;
  • Ветеринарни дејности;
  • Изнајмување и давање под закуп (лизинг) на моторни возила;
  • Дејности на приватна заштита и услуги на заштита со помош на сигурносни системи;
  • Дејности на повикувачки центри;
  • Општи дејности на јавната управа, само за итни и недоложни работи поврзани со одржување на седници, инспекциски надзори, чување на шуми, а кои работи се од витално значење за државниот и јавниот интерес;
  • Работи на одбраната;
  • Судски и правосудни дејности;
  • Работи на јавниот ред и безбедноста;
  • Дејности на пожарникарската служба;
  • Дејности за здравствена заштита;
  • Дејности на социјалната заштита со сместување;
  • Креативни, уметнички и забавни дејности;
  • Дејности на музеите;
  • Дејности на зоолошки градини и природни резервати;
  • Спортски, забавни и рекреативни дејности;
  • Погребни и слични дејности;
  • Царинска служба на гранични премини;
  • Дејности кои имаат карактер на помошни или придружни дејности со цел непречено функционирање на наведените дејности, врз основа на склучен договор со работодавачот и
  • Работни места од други дејности кои не се опфатени измените, а кои имаат карактер на помошни и придружни работи за непречено извршување на основната дејност на работодавачот.

Работниците кај работодавачите од трговија на мало и трговија на големо, денот на неделен одмор го користат во согласност со Законот за трговија.

Во случај на природна и друга несреќа или хаварија и спречување на последиците од нив или кога таква несреќа непосредно се очекува, на барање на работодавачот, работникот е должен да работи во недела заради заштита на животот и здравјето на луѓето и спречување на непоправлива материјална штета.

Санкции за работодавачите кои ќе го прекршат законот

  • ќе им се забрани работа од 15 дена и
  • ќе им се издаде прекршочен платен налог

Доколку работодавачот го повтори прекршокот, забраната за работа ќе биде 30 дена.

Во периодот на забрана за работа, работодавачот е должен:

  • на работниците да им исплатува надомест на плата во висина од исплатената плата на работнникот во претходниот месец и придонеси од плата и
  • да не го намали бројот на работници.